• Film Commission

    El Film Commission públicu del Principáu d´Asturies, dende la so creación en mayu del 2016, collaboró nel rodaxe de bien de producciones de cine, televisión y publicidá, coles mires de promover y consolidar la rexón como escenariu pa rodaxes, fomentando tanto´l turismu cinematográficu y la cultura del Principáu como la industria audiovisual asturiana.

    Ye´l casu, ente munchos otros, d´El secreto de Marrowbone, ópera prima del cineasta asturianu Sergio G. Sánchez; el primer llargumetraxe del asturianu Samu Fuentes, Bajo la piel del lobo; La Zona, serie esclusiva de Movistar+ creada polos hermanos Alberto y Jorge Sánchez-Cabezudo; MAUS, el primer llargu del director uviedín Yayo Herrero; Aquilo que arde, del aclamáu cineasta Oliver Laxe; Si yo fuera rico, dirixida por Álvaro Fernández Armero, o La influencia, trabayu de presentación de Denis Rovira. Asina mesmo, el Film Commission y Turismu Asturies collaboraron colos documentales Cantábrico. Los dominios del osu pardo, de Joaquín Gutiérrez Acha, y 100 días de soledad, de José Díaz, pa los que se desenvolvieron delles acciones de sofitu a la difusión y promoción.